Colts búið að vinna 21 leik í röð

Það er ótrúleg sigling á liði Indianapolis Colts í NFL-deildinni þessa dagana en liðið er búið að vinna alla 12 leiki sína í deildinni í vetur og 21 leik í röð í deildinni. Liðið vann níu síðustu leiki sína í deildinni í fyrra.

Metin falla hvert af öðru og menn trúa vart þeim árangri sem Peyton Manning, leikstjórnandi liðsins, er að ná með liðinu.

Colts er nú búið að vinna 12 leiki á tímabili sjö tímabil í röð sem er NFL-met. Liðið er einnig búið að jafna met San Francisco yfir flesta sigra á áratug (113) og getur slegið það met um næstu helgi gegn Denver.

New Orleans Saints er einnig búið að vinna alla 12 leiki sína í vetur en þetta er í fyrsta sinn í sögu deildarinnar sem tveimur liðum tekst að vinna 12 fyrstu leiki vetrarins.