United samþykkir metkauptilboð Real Madrid í Cristiano Ronaldo

Englandsmeistarar Manchester United hafa staðfest að þeir hafi samþykkt 80 milljón punda kauptilboð Real Madrid í Cristiano Ronaldo.

Portúgalinn hefur því fengið leyfi til þess að hefja viðræður við spænska stórliðið og mun í framhaldi af því gangast undir læknisskoðun í Madrid.

„Manchester United hefur samþykkt 80 milljón punda metkauptilboð í Ronaldo frá Real Madrid. Ronaldo bað um að fá að yfirgefa félagið og eftir að forráðamenn United ræddu við umboðsmenn leikmannsins var ákveðið að taka kauptilboðinu og leyfa honum að hefja viðræður við forráðamenn spænska félagsins. Búist er við því að gengið verði frá samningum allra aðila fyrir 30. júní," segir í yfirlýsingu frá Manchester United.

Ronaldo, 24 ára, kom til United eftir keppnistímabilið 2002-2003 á 12,24 milljónir punda og hefur verið allt í öllu í einokun félagsins á Englandi síðustu ár. Ronaldo hefur skorað 84 mörk í 196 leikjum fyrir félagið en hann var sem kunnugt er valinn besti leikmaður heims af Fifa í byrjun þessa árs.