Beðið eftir Hjaltalín

Nýja platan með Hjaltalín heitir Terminal og fylgir eftir Sleepdrunk Seasons, sem kom út fyrir jólin 2007. Nýja platan er í vinnslu erlendis um þessar mundir og kemur til landsins eftir tæpar tvær vikur. Nokkur spenna hefur skapast fyrir plötunni, sem minnir kannski helst á þá stemningu sem var í gangi þegar Sigur Rós sendi frá sér Ágætis byrjun fyrir rúmum tíu árum.

Ef Sigur Rós var Þursaflokkur X-kynslóðarinnar er spurning hvort Hjaltalín sé Todmobile krúttkynslóðarinnar. Að minnsta kosti er Hjaltalín ófeimin við mikið flúr og skraut og nýtir möguleika sinfóníuhljómsveitarinnar til hins ýtrasta á Terminal.

Á plötunni eru lögin „Suitcase Man“ og „Stay by You“ sem þegar hafa heyrst, auk níu annarra. Öll eru sungin á ensku. Umslagið gerir Regína María Árnadóttir. Nú er bara að sjá hvort platan stendur undir væntingum.- drg