Landsbankinn hefur gengið að veðum í BG Holding

Landsbanki Íslands hf. hefur gengið að veðum í BG Holding ehf. sem er gert í beinu framhaldi af beiðni um greiðslustöðvun sem send var enskum dómstóli í gær. Þetta kemur fram í skilanefnd frá Landsbankanum.

Þar kemur jafnframt fram að Landsbanki Íslands hf. hafi skipað PricewaterhouseCoopers LLP sem tilsjónarmenn með veðunum. Í tilkynningu frá skilanefndinni kemur fram að Landsbanki Íslands sé ekki orðinn beinn eigandi bréfanna heldur er með þessu tryggt að ekki sé hægt að ráðstafa fjárfestingunum án samráðs við bankann.

Þau veð sem um ræðir eru eignarhlutir BG Holding ehf. í eftirfarandi fyrirtækjum:

· Matvöruversluninni Iceland Foods Group (13.73% hlutur)

· Highland Group Holdings Limited sem rekur verslunarmiðstöðvar undir heitinu House of Fraser (34.90% hlutur)

· Aurum Group sem rekur verslanir undir merkjum Goldsmiths, Mappin & Webb og Watches of Switzerland (37.75% hlutur)

· Corporal Ltd sem á leikfangaverslanir Hamleys (63.7%)

Skilanefnd Landsbanka Íslands hf. tekur fram að:

· Ekkert fyrirtæki á Bretlandseyjum hafi farið í greiðslustöðvun vegna aðgerða Landsbankans gagnvart BG Holding ehf. og þar að auki hafi aðgerðirnar ekki nein áhrif á lagastöðu eða starfsemi þeirra fyrirtækja sem eru í eigu BG Holding ehf.

· Landsbanki Íslands hf. hafi tekið ákvörðun um að sækjast eftir greiðslustöðvun BG Holding ehf. í Englandi til þess að tryggja að bankinn hefði góða og örugga stjórn á greiðslustöðvunarferlinu. Með þessu nái bankinn að vernda þær bresku eignir sem eru í eigu BG Holding ehf, dótturfélagi Baugs Group hf.

· Meirihluti hlutafjáreigna BG Holding ehf. sé í breskum fyrirtækjum sem reka verslanir undir mjög þekktum vörumerkjum. Landsbanki Íslands hf. sé sannfærður um að með aðgerðum sínum nái bankinn að slá skjaldborg um þessa eignarhluti og auka langtímaverðmæti eigna bankans, sem muni koma öllum kröfuhöfum bankans til góða.

· Landsbanki Íslands hf. líti einnig svo á að með þessu sé bankinn að sýna í verki stuðning sinn við stjórnunarteymin í Iceland Foods, House of Fraser, Aurum og Hamleys.

· Það sé einnig vert að leggja áherslu á að með aðgerðum sínum hafi Landsbanki Íslands hf. stigið skref í átt til stöðugleika fyrir þau fyrirtæki sem um ræðir. Það sé von bankans að stjórnendur fyrirtækjanna geti nú algjörlega einbeitt sér áfram að farsælum rekstri.

Í fréttatilkynningu frá Landsbankanum kemur fram að það sé skýr fyrirætlun skilanefndar að selja engar eignir á undirverði og skilanefndin telji að það beri að líta á fjárfestingar BG Holding ehf. sem langtímaeignir sem munu skila auknu verðmæti til kröfuhafa bankans.