Glitnir gjaldfellir öll lán Baugs

Skilanefnd Gamla Glitnis ákvað í dag að gjaldfella öll lán Baugs Group og tengdra félaga, segir í tilkynningu sem send var fjölmiðlum. Þar kemur fram að þetta hafi verið gert í framhaldi af ákvörðun skilanefndar Landsbanka Íslands hf. um að óska eftir greiðslustöðvun hjá BG Holding ehf., dótturfélagi Baugs Group hf. í Bretlandi. Skilanefnd Glitnis telji að við þær aðstæður sem nú séu uppi sé hagsmunum bankans best borgið með því að hann taki yfir þá eignarhluti í Baugi sem Gamli Glitnir hafi að veði til tryggingar lánum sínum til félagsins.

Þá segir að Skilanefnd Glitnis hafi haft fjárhagslega stöðu Baugs til skoðunar um nokkurra mánaða skeið og hafi í þeim efnum notið ráðgjafar PricewaterhousCoopers og Deloitte í Bretlandi. Þrátt fyrir fjölbreyttar aðgerðir undanfarna 12 mánuði, þar sem allir hafi lagst á eitt um að styðja við félagið, blasir við í ljósi mjög veikrar fjárhagsstöðu að félagið muni ekki geta gert upp skuldir sínar við bankann.

„Skilanefnd Glitnis hefur haft til skoðunar þær hugmyndir sem forsvarsmenn Baugs kynntu fyrir íslenskum lánastofnunum. Það er mat skilanefndarinnar og ráðgjafa hennar, PricewaterhouseCoopers og Deloitte í Bretlandi, að þær hugmyndir séu í senn óraunhæfar og óframkvæmanlegar. Það er jafnframt mat ofangreindra ráðgjafa og skilanefndar Glitnis, að besta leiðin til að gæta hagsmuna bankans við núverandi aðstæður, sé að vinna með öðrum veðhöfum að því að hámarka verðmæti þeirra eigna bankans sem tengjast Baugi. Með þessum aðgerðum er meðal annars verið að verja hagsmuni þeirra fyrirtækja sem Baugur er hluthafi í á Bretlandseyjum og þeirra tugþúsunda sem hjá þeim starfa," segir í tilkynningunni.

Þá segir að þar sem ljóst sé að Baugi muni ekki takast að efna skuldbindingar sínar við gamla Glitni og þar sem fyrir liggi að aðrar fjármálastofnanir muni ekki taka þátt í endurskipulagningu félagsins sé það mat skilanefndar Glitnis að fyrrnefndar aðgerðir séu óhjákvæmilegar. Skilanefndin telji jafnframt að eins og málefnum félagsins sé nú komið þjóni umbeðin greiðslustöðvun Baugs Group á Íslandi ekki tilgangi.