Ferguson: Ekkert frábær frammistaða

Sir Alex Ferguson, stjóri Man. Utd, sagðist vera hamingjusamur eftir leik Man. Utd og Inter í Meistaradeildinni í kvöld. Sigur United kom þó ekki án vandræða.

„Þetta var þannig leikur að við urðum að spila öðruvísi en við erum vanir. Inter sýndi á köflum hvað liðið er geysilega reynslumikið. Inter sýndi þetta Suður-Ameríska hugarfar á köflum og það var erfitt að brjóta þá niður," sagði Ferguson.

„Úrslitin voru að sjálfsögðu góð en frammistaðan var ekkert frábær hjá okkur," sagði Ferguson sem játaði að hafa verið áhyggjufullur fyrir leiki liðanna.

„Þegar ég heyrði fyrst af því hvaða liði við værum að fara að spila á móti hugsaði ég með mér að það hefði ekki verið hægt að fá erfiðari andstæðinga. Við vorum að leika gegn reynslumiklu liði sem er efst á Ítalíu. Það er aldrei auðvelt að spila gegn ítölsku liði og það sannaðist enn og aftur í kvöld."