Ganga 450 kílómetra til Reykjavíkur til að kaupa ís

„Þetta var nú bara hugmynd sem við vorum að gantast með í sumar, að ganga frá Ísafirði til Reykjavíkur til að kaupa ís. Svo létum við slag standa!“ Þetta segir Jón Björnsson, sem ásamt Hjálmari Forna Steingrímssyni lagði af stað fótgangandi til Reykjavíkur á fimmtudaginn í síðustu viku.

Unglingurinn Hjálmar dvaldi með Jóni á Hornströndum í sumar, en þar er Jón landvörður. Hann sást á dögunum í þætti Gísla Einarssonar, Út og suður. Þar kom fram að hann skokkar um allt á stígvélum.

„Við erum nú bara í venjulegum strigaskóm í ferðinni, enda erum við léttir og það er lítið álag á skónum. Á Vestfjörðum gengum við beint af augum yfir fjöll og firnindi. Þarna eru fá landbúnaðarsvæði og auðvelt að komast um, engar girðingar og slíkt. Eftir að við komum á þjóðveginn göngum við bara eftir honum. Það er styst og auðveldast.“

Jón segir þá félaga gista í tjaldi, en stundum í svefnpokagistingu. Þetta er um 450 kílómetra leið og mun taka tíu daga þegar upp er staðið, 45 km á dag. „Við komum í bæinn á morgun, en við erum ekki búnir að ákveða hvar við fáum okkur ís – og ekki einu sinni hvernig ís. Það koma margir staðir til greina.“ - drg