Messi vill vinna Gullknöttinn

Lionel Messi hefur sett stefnuna á að vinna hinn svokallaða Gullknött í ár og þykir hann eiga góðan möguleika á því.

Árlega veitir France Football verðlaun þeim sem þykir hafa skarað fram úr í evrópskri knattspyrnu og er líklegt að sá maður komi úr röðum Barcelona sem vann alla mögulega titla á síðustu leiktíð.

„Ég vil vinna Gullknöttinn en ég held að hvaða leikmaður Barcelona sem er eigi verðlaunin skilið fyrir síðustu leiktíð," sagði Messi.

„Mér finnst sagan vera á mínu bandi þar sem ég var þriðji í kjörinu fyrir þremur árum, annar í fyrra og vonandi verð ég í fyrsta sæti í ár."