Sköllóttur eins og Georg

„Þetta er bara í starfslýsingunni, maður verður að fórna sér fyrir listina,“ segir Jörundur Ragnarsson leikari sem gengur nú um með hatt eða húfu meðal almennings. Ástæðan er ekki sú að hann sé haldinn einhverjum sjúklegum áhuga á höfuðfötum, síður en svo. Jörundur er nefnilega kominn með skalla. Þó ekki af fúsum og frjálsum vilja eða af því að það er svo töff heldur vegna þess að persóna hans í leikverkinu Heima er best, sem frumsýnt verður á föstudaginn í Borgarleikhúsinu, er með rakaðan skalla.

Jörundi hefur ætíð þótt vænt um hárið sitt en þarf nú að raka á sér kollinn næstu mánuðina. Hann segist loksins skilja gremju Jóns Gnarr, mótleikara síns í Vaktar-seríunni, en eins og alþjóð veit þá rakaði Jón á sig skalla fyrir hlutverk Georgs Bjarnfreðarsonar. „Ég finn alveg svakalega til með honum núna. Ég hitti hann í gær og hann lýsti yfir samúð sinni með mér,“ segir Jörundur og bætir því við að honum hafi þótt Jón væla fullmikið yfir skallanum á sínum tíma. „En núna, þegar maður er kominn með þetta sjálfur, þá er þetta meira en að segja það. Maður er farinn að fjárfesta í höttum og húfum og maður getur ekki farið í sund svona.“

Jörundur er ekki í vafa um að þetta sé um það bil það heimskulegasta sem hann hafi látið hafa sig út í. Og ekki vekur skallinn mikla hrifningu heima fyrir þar sem mótleikkona hans í verkinu og unnusta, Dóra Jóhannsdóttir, ræður ríkjum. Sjálf þurfti hún að dekkja á sér hárið, sem Jörundi finnst nú bara smámál miðað við það sem hann þarf að þola. Og Dóra hefur mjög ákveðnar skoðanir á skallanum. „Henni finnst þetta ekkert sérstaklega flott. Þetta var fyndið í tíu mínútur en nú er ég bara ofboðslega asnalegur. Enda ætla ég að ganga um með hatt, líka heima hjá mér.“ freyrgigja@frettabladid.is