Ríkið borgar auglýsingar á lambakjöti

„Við eigum í harðri samkeppni við aðrar kjöttegundir og höfum því miður ekki sömu möguleika og sauðfjárbændur á að kynna okkar kjöt því ríkið stendur oft undir kostnaði á auglýsingum og kynningu á lambakjöti.“

Þetta segir Hörður Harðarson, formaður og framkvæmdastjóri Svínaræktarfélags Íslands, en svínakjötsframleiðsla dróst talsvert meira saman en framleiðsla annarra kjöttegunda í september síðastliðnum miðað við september í fyrra.

Svínakjötsframleiðslan dróst saman um 15,8 prósent en samdráttur í allri kjötframleiðslu nam 3,5 prósentum. Alifugla- og sauðfjárframleiðsla dróst lítillega saman en nautakjötsframleiðsla jókst. Þá var talsvert meira framleitt af hrossakjöti.

Hörður segir erfitt að keppa við auglýsingaherferðir sem kostaðar séu af ríkissjóði. Málið hafi margsinnis verið tekið upp við stjórnvöld, án þess að breytingar hafi orðið á. Landbúnaðarpólitík ráði för.

Í fjárlagafrumvarpi næsta árs er gert ráð fyrir að greiðslur vegna sauðfjárframleiðslu nemi tæpum 4,2 milljörðum króna en þar af fara 347 milljónir til markaðsstarfs og birgðahalds. Fjárhæðirnar eru sýnu hærri en í fjárlögum ársins í ár. Útgjöld ríkisins til sauðfjárframleiðslu eru grundvölluð á samningum ríkisins og sauðfjárbænda. Ríkið gerir sambærilega samninga vegna mjólkurframleiðslu en hvorki vegna svínakjöts- né alifuglaræktunar.

Fleiri ástæður en auglýsingamál búa þó að baki minni sölu og framleiðslu á svínakjöti, að mati Harðar. Fólk hafi minna á milli handanna, sem skýri samdrátt í heildarkjötframleiðslu síðasta árið en í tilviki svínakjötsins komi líka annað til. „Fjöldi verkamanna er fluttur úr landi aftur til síns heima eftir að stóriðju- og virkjanaframkvæmdum lauk í bili. Uppistaðan í fæðuvali þeirra var svínakjöt,“ segir hann. Svínakjötsframleiðendur mættu aukinni eftirspurn með aukinni framleiðslu en nú hefur dæmið snúist við.

Að sögn Harðar hefur svínaflensan ekki haft áhrif á neyslu svínakjöts. Fólk virðist meðvitað um að ekki séu tengsl milli neyslu þess og flensunnar. bjorn@frettabladid.is