Jónas: Óásættanlegt

Jónas Guðni Sævarsson, markaskorari Íslands í 2-1 tapleik gegn Færeyjum í dag, var ekki sáttur við niðurstöðuna.

„Það er alltaf gaman að skora en þetta var alls ekki nógu gott. Það er óásættanlegt að tapa fyrir Færeyjum hér á heimavelli," sagði Jónas eftir leik.

„Bæði mörkin sem við fengum á okkur komu úr föstum leikatriðum. Það er einfaldlega ekki nógu gott. Við þurftum að dekka betur og taka meiri ábyrgð á okkar manni. Þetta er eitthvað sem þurfum að laga."

Ísland var mun meira með boltann í leiknum en illa gekk að skapa færi. „Óli (Ólafur Jóhannesson þjálfari) lagði upp með ákveðnar áherslur fyrir þennan leik og náðum við ekki að fylgja þeim."