Pires spenntur fyrir Arsenal

Robert Pires, leikmaður Villarreal, er spenntur fyrir því að mæta Arsenal í fjórðungsúrslitum Meistaradeildar Evrópu en dregið var í dag.

Pires var alls í sex ár hjá Arsenal og lék með liðinu í úrslitum Meistaradeildarinnar árið 2006 áður en hann fór til Villarrea.

„Þetta verður sérstakur leikur," sagði Pires um leik liðanna á Emirates-leikvanginum. „Það verður gaman fyrir mig að koma þangað aftur en sem leikmaður Villarreal vil ég auðvitað vinna þennan leik með mínu félagi."

Pires var í liði Arsenal sem sló út Villarreal í undanúrslitum Meistaradeildarinnar árið 2006.