Bandarískum blaðakonum fagnað við heimkomuna

Bandaríkin, AP Bandarísku blaðakonurnar Euna Lee og Laura Ling fengu góðar móttökur þegar þær komu til Bandaríkjanna í gær og hittu fjölskyldur sínar eftir langan aðskilnað.

„Síðustu 140 dagar hafa verið þeir erfiðustu í lífi okkar,“ sagði Ling. Aðeins rúmum sólarhring áður höfðu þær óttast að verða fluttar í þrælkunarbúðir, en síðan voru þær fluttar á annan stað:

„Þegar við gengum í gegnum dyrnar sáum við Bill Clint­on forseta standa fyrir framan okkur,“ sagði hún. „Okkur brá en þá vissum við strax að martröðinni væri lokið og nú erum við hingað komnar, heim til okkar og frjálsar.“

Konunum var haldið í einangrun og fengu lélegt fæði, að því er systir Ling segir: „Þeim var haldið aðskildum lengst af,“ sagði hún. „Við réttarhöldin gátu þær faðmast, en svo ekki söguna meir.“

Þær Lee og Ling starfa fyrir sjónvarpsstöð, sem er í eigu Als Gore, fyrrverandi varaforseta Bandaríkjanna. Þær voru handteknar í mars síðastliðnum við landamæri Kína og hlutu dóm fyrir að fara ólöglega yfir landamærin í fjandsamlegum tilgangi. Dómurinn hljóðaði upp á tólf ára þrælkunarvinnu.

Bandaríkjamenn fylgdust með heimkomu blaðakvennanna í beinni útsendingu, en ríkissjónvarpið í Norður-Kóreu sýndi ekki myndir af blaðakonunum heldur aðeins af Clinton þegar hann kvaddi og hélt um borð í flugvélina.

Óvíst er hvaða þýðingu heimsókn Clintons til Norður-Kóreu mun hafa fyrir samskipti ríkjanna.

Robert Gibbs, blaðafulltrúi Baracks Obama, fullyrti að Clinton hefði ekki haft nein skilaboð meðferðis frá Obama til Kims. Hann sagði það algerlega undir Norður-Kóreu komið hvort heimsóknin yrði til þess að viðræður um kjarnorkumál gætu hafist á ný.

Norður-Kóreustjórn hætti fyrr á árinu þátttöku í milliríkjaviðræðum, sem snerust um að Bandaríkin, Kína, Rússland, Japan og Suður-Kórea reyndu að fá Norður-Kóreu til þess að hætta við öll kjarnorkuáform gegn fjárhagsaðstoð og niðurfellingu refsiaðgerða.

Samskiptin við Norður-Kóreumenn versnuðu enn þegar þeir gerðu tilraunir með flugskeyti og hófu kjarnorkuvinnslu á ný.gudsteinn@frettabladid.is