Plata með bandi semhefur aldrei spilað saman

Í byrjun þessa áratugar vöktu tvær heimildamyndir Gríms Hákonarsonar um Varða sem fór á vertíð og til Evrópu verðskuldaða athygli. Hallvarður Ásgeirsson, „Varði" í myndunum, hefur ekki setið auðum höndum síðan þá og er nú að gefa út plötuna Observation með hljómsveitinni The Coma Cluster.

„Ég var við nám í Brooklyn og ég og vinur minn Sigþór „Siffvilnius" Hrafnsson vildum gera eitthvað saman," segir Hallvarður. „Við fórum að senda fæla á milli landa og smám saman varð platan til. Jón Indriðason, eða Pjotr Verstappen eins og hann kallar sig á plötunni, bjó í Danmörku á þessum tíma og kom inn í þetta. Svo fengum við söngkonuna Yukiko Shimizu sem bjó í Tókýó til að leggja í púkkið. Þetta var allt gert í gegnum Netið. Hljómsveitin hefur aldrei spilað saman en samt hljómar platan merkilega mikið eins og band."

Platan var í smíðum frá 20. júlí 2008 til 22. október 2009. „Við köllum þetta abstrakt speis-rokk. Þetta er ambient-kennt og framúrstefnulegt," segir Hallvarður. „Ég hef gaman af King Crimson, metali, Sonic Youth og pönki. Sigfús hefur verið í mörgum verkefnum í gegnum tíðina. Við spilum báðir á gítar og hann á orgel þar að auki. Platan var eiginlega bara unnin með því að beita útilokunaraðferðinni."

Varði er orðinn hámenntaður músíkant. Hann útskrifaðist úr tónsmíðadeild LHÍ 2006, tók kennsluréttindin og svo master í tónsmíðum frá Brooklyn College. Hann kennir nú í Tónlistarskólanum í Hafnarfirði. „Svo er maður að spila með hinum og þessum. Til dæmis með tónsmíðafélaginu S.L.Á.T.U.R. Annars er ég bara að komast niður á jörðina eftir Bandaríkjadvölina. Það var alveg frábær tími, en verst þegar gengið hrundi á miðju námsári. Maður var að drepast í nokkra mánuði en svo fóru þeir að borga út námslánin í dollurum svo þetta slapp fyrir horn."

Coma Cluster-platan er eingöngu fáanleg á Netinu: comacluster.net.

drg@frettabladid.is