Erfitt að fylgja aflareglu síldarkvótans

Búist er við að sjávar­útvegsráðherra tilkynni í dag ákvörðun um heildarafla af íslenskri sumargotsíld.

Hafrannsóknastofnunin telur að allt að 40.000 tonna veiðar hafi ekki umtalsverð áhrif á stofninn þótt óvissa sé um ástand hans og horfur vegna sníkjudýrs sem herjar á síldina. Talið er að um 40 prósent af hrygningarstofninum muni drepast úr sýkingunni fyrir hrygningu næsta sumar. Í fyrra voru veidd 152.000 tonn af sumargotsíld og 159.000 tonn árið áður.

Í sumar frestaði Hafrannsóknastofnunin því að gera tillögur um hámarksveiði á hefðbundnum tíma vegna óvissu um ástand stofnsins. Niðurstöður úr bergmálsmælingum, sem gerðar voru á síldargöngum við Breiðafjörð seinni partinn í október, hafa hins vegar leitt í ljós að stofninn er stærri en fram kom við sambærilegar mælingar í sumar og talsvert stærri en búist var við, að sögn Guðmundar Óskarssonar, síldarsérfræðings hjá Hafrannsóknastofnuninni.

Við venjulegar aðstæður eru veidd um 18 prósent úr hrygningar­stofni, sem mælist nú 465.000 tonn. 40.000 tonna kvóti er langt undir aflareglunni, eða um 8,6 prósentum af hrygningarstofni.

„Það er erfitt að fylgja aflareglu núna, segir Guðmundur. „En við teljum að stofninn ætti að þola þessar veiðar.“ Stofnunin leggur hins vegar áherslu á það í ráðgjöfinni að veiðinni verði stýrt svo að hægt verði að fylgjast með þróun sýkingarinnar með því að taka sýni af öllum helstu veiðisvæðum yfir hefðbundinn vertíðartíma. Guðmundur sagði að enn sem komið er væri sýkingin ekki farin að berast í hold síldarinnar og meðan svo er hafi hún lítil áhrif á nýtingarmöguleika aflans. Öll síldin fari í manneldi.

Í október var gefinn út 15.000 tonna rannsóknarkvóti, sem nýttist til fyrrgreindra rannsókna. Enn er verið að veiða úr þeim kvóta þótt skipin bíði ákvörðunar ráðherra um auknar veiðar.

Ásgrímur Halldórsson SF var að veiðum rétt utan við höfnina í Stykkishólmi þegar Fréttablaðið hringdi um borð síðdegis í gær. Ásgrímur Ingólfsson skipstjóri sagðist búinn að fá 300 tonn í tveimur köstum og sagði að aflinn hentaði vel í frystingu. Hann sagðist vona að sjávarútvegs­ráðherra heimilaði veiðar umfram ráðleggingu Hafrannsóknastofnunar um 40.000 tonn. „Það þarf að líta á fleira en ráðgjöfina, bæði ástandið í þjóð­félaginu og annað,“ sagði hann.

peturg@frettabladid.is