Forstjóri FME: Löngu hættur að hugsa um Hafskipsmálið

Gunnar Þ. Andersen nýráðinn forstjóri Fjármálaeftirlitsins rak útibú Cosmos dótturfyrirtækis Hafskipa í New York fyrir rúmum tuttugu árum síðan. Hann segir aðspurður um aðkomu sína að Hafskipsmálinu að það sé gamalt mál sem hann sé löngu hættur að hugsa um. Honum líkaði þó ekki starfið hjá Hafskipum og sagði upp. „Það samræmdist ekki upplifinu minni af siðferði," segir Gunnar sem var hjá Landsbankanum þegar Björgólfur Guðmundsson keypti bankann. Þá sagði hann líka upp störfum. Nú er Gunnar hinsvegar orðinn forstjóri Fjármálaeftirlitsins sem hann segir mikinn heiður en um leið mikla áskorun.

„Ég tel þetta mjög áhugavert starf, annars hefði ég ekki sótt um," segir Gunnar sem telur sig búa yfir mikilli reynslu úr bankaheiminum en hann starfaði meðal annars sem framkvæmdastjóri alþjóða- og fjármálasviðs hjá Landsbankanum.

Hann segist einnig búa yfir reynslu í samskiptum við matsfyrirtæki og erlenda banka.

Hann segir að hlutverk FME sé meðal annars að endurheimta traust erlendis frá. „Við þurfum að endurreisa kerfið, byggja grunninn og hraða úrvinnslunni."

Gunnar segist hafa hitt starfsfólk Fjármálaeftirlitsins og hafi verið mjög imponeraður af starfsfólkinu. Það hafi verið brosmilt og í góðu jafnvægi.

„Við vitum hvað við ætlum að gera. Ég er því bjartsýnn á að okkur takist að vinna okkur í gegnum þetta, við verðum hinsvegar í kastljósinu og það verður vel fylgst með okkur."

Aðspurður hversvegna hann hafi hætt störfum fyrir Hafskip á sínum tíma segir Gunnar að aðferðir Hafskipsmanna hafi ekki samræmst sinni upplifun af siðferði. Hann hafi hætt vegna svipaðra ástæðna þegar Björgólfur keypti Landsbankann.

„Okkur hefur ekki tekist að vinna vel saman," segir Gunnar um samskipti þeirra Björgólfs Guðmundssonar.

Aðspurður hvort þeir Björgólfur séu andstæðingar segir Gunnar svo ekki vera.

„En ef það koma upp einhver mál sem kynnu að tengjast honum, fjölskyldu hans eða fyrirtækjum með einhverjum hætti, þá fá þau mál sömu meðhöndlun og önnur."