Búið að ráða leikstjóra fyrir Jar City

Bandaríski leikstjórinn Tod Williams hefur verið ráðinn til að leikstýra amerísku útgáfunni af Mýrinni eða Jar City eins og hún heitir á enskri tungu. Þetta staðfestir Baltasar Kormákur í samtali við Fréttablaðið.

Framleiðslufyrirtækið Overture framleiðir myndina ásamt Baltasar og dreifir henni en hún mun gerast að mestu leyti í Louisiana auk þess sem einhver atriði verða tekin upp í Chicago.

Baltasar líst vel á leikstjórann þótt hann hafi kannski ekki gert margar myndir. „Hann leikstýrði kvikmyndinni The Door in the Floor með Jeff Bridges og Kim Basinger sem var byggð á bók eftir John Irving. Hún var virkilega flott," segir Baltasar og er glaður að fyrirtækið skuli hafa farið þá leið að velja leikstjóra sem gerir vandaðar myndir. Engir leikarar hafa verið ráðnir í hlutverk Erlendar og Evu Lindar en Baltasar segir fyrirtækið vera með lista af flottum týpum í hlutverkin. Af trúnaðarástæðum geti hann hins vegar ekki gefið þau nöfn upp.

Leikstjórinn hefur lesið handritið að myndinni og líst vel á það. Vissulega sé margt breytt en einhverju hafi verið haldið til haga. „Sumar senurnar eru alveg eins og í Mýrinni, og einhverjar setningar eru beint upp úr myndinni þannig að þeir halda töluverðri tryggð við upprunalegu útgáfuna." Baltasar er jafnframt ánægður fyrir hönd Arnaldar Indriðasonar en tvö verka hans eru nú í réttum farvegi í Hollywood, Mýrin og svo auðvitað Reykjavík-Rotterdam.

„Við erum með tvær myndir sem eru komnar þetta langt í endurgerðarferlinu og báðar tengjast honum, þannig að það hlýtur að segja eitthvað." Baltasar bætir því við að hann hafi fundið fyrir töluvert meiri áhuga á Reykjavík-Rotterdam eftir að fréttir bárust þess efnis að Mark Wahlberg hygðist leika í bandarísku útgáfunni. „Það voru þýskir aðilar sem föluðust eftir myndinni og svo er örugglega verið að hlaða henni mikið niður á Torrent."