Milljón fyrir bestu myndirnar

„Okkur fannst í ljósi ástandsins í þjóðfélaginu tilvalið að koma með eitthvað spennandi og jákvætt fyrir fólkið í þjóðfélaginu að hugsa um,“ segir Guðrún María Guðmundsdóttir, ritstjóri Símaskrárinnar.

Verðlaunasamkeppni hefst í næstu viku um forsíðu Símaskrárinnar 2010 þar sem áhersla verður lögð á að sýna Ísland í jákvæðu ljósi. Allir geta tekið þátt og er verðlaunaféð ein milljón króna. Sjö hundruð þúsund fást fyrir fyrsta sætið, 200 þúsund fyrir annað og 100 þúsund fyrir það þriðja. Sérstök aukaverðlaun að upphæð 50 þúsund krónur verða jafnframt veitt fyrir jákvæðustu tillöguna.

Sigurmyndin verður prentuð í 150 þúsund eintökum og því um einstakt tækifæri að ræða fyrir áhugasama Íslendinga. „Það verður voðalega gaman að vinna og fá myndina sína á forsíðu á útbreiddustu bók landsins, eins og við köllum hana,“ segir Guðrún María. Myndverkið getur verið ljósmynd, ljóð, teikning eða á hverju því formi sem hægt er að prenta á forsíðu Símaskrárinnar og hæfir viðfangsefninu.

Hugleikur Dagsson hefur átt forsíðu Símaskrárinnar síðustu tvö árin en núna var ákveðið að breyta til. Guðrún María leggur áherslu á að allir geti tekið þátt og sent inn sínar tillögur. „Þriggja ára gamalt barn má teikna mynd af Íslandi í jákvæðu ljósi og senda inn. Það fá allir tækifæri. Okkur finnst þetta rosalega spennandi verkefni og við hlökkum mikið til að sjá hvað kemur inn.“

Skilafrestur rennur út 1. desember. Eftir að greint hefur verið frá verðlaunahöfum er gert ráð fyrir að halda sýningu á innsendum tillögum.