Bæjarar kannast ekki við fyrirspurnir um Lucio

Talsmaður Bayern München segir ekki rétt að enska úrvalsdeildarfélagið Manchester City sé í viðræðum við þýska félagið vegna fyrirhugaðra kaupa á varnarmanninum Lucio.

Raunar segir talsmaðurinn að félaginu hafi hvorki borist fyrirspurn né símtal vegna Brasilíumannsins.

„Ég get staðfest það að forráðamenn Bayern München hafa ekki hitt neinn, né heyrt í neinum aðila varðandi Lucio. Varnarmaðurinn er nú í fríi og við væntum þess að hann komi aftur til leiks þegar æfingar hefjast á næstu dögum og geri sig klárann í komandi tímabil í þýsku deildinni," segir Markus Horwick talsmaður Bayern München.