Þróunarsamvinnu Íslendinga og Namibíumanna að ljúka

Tuttugu ára þróunarsamvinnu Íslendinga og Namibíumanna lýkur í lok næsta árs. Íslensk stjórnvöld hafa formlega tilkynnt stjórnvöldum í Namibíu að ekki sé unnt að verða við óskum þeirra um framlengingu á samstarfssamningi milli þjóðanna um þróunarsamvinnu. Samstarfsþjóðum Íslendinga í tvíhliða þróunarsamvinnu fækkar því um helming á tveimur árum, úr sex í þrjár, en þegar hefur umdæmissskrifstofu Þróunarsamvinnustofnunar Íslands á Srí Lanka verið lokað og þessa dagana er verið að loka skrifstofunni í Níkaragva. Þetta kemur fram í fréttatilkynningu frá Þróunarsamvinnustofnun.

„Sighvatur Björgvinsson framkvæmdastjóri ÞSSÍ afhenti fyrir skömmu yfirmanni NPC, skrifstofu á vegum embættis forseta Namibíu, svarbréf frá Össuri Skarphéðinssyni utanríkisráðherra við beiðni um að samstarfssamningur þjóðanna yrði framlengdur. Þar kemur fram að vegna efnahagsástandsins í kjölfar bankahrunsins væri íslenska ríkisstjórnin nauðbeygð til þess að gera mikið átak til lækkunar ríkisútgjalda sem óhjákvæmilega kæmi niður á getu þjóðarinnar til þess að veita þróunaraðstoð. Sighvatur skýrði jafnframt frekari ástæður þess að Íslendingar yrðu að hætta formlegri þróunaraðstoð við Namibíu í árslok 2010 en hét því að standa við allar skuldbindingar og fyrirheit um framkvæmd samningsbundinna verkefna," segir í tilkynningunni.

Farið hefur verið fram á það við íslensku starfsmennina tvo sem starfa í Namibíu á vegum ÞSSÍ, Vilhjálm Wiium umdæmisstjóra og Davíð Bjarnason verkefnisstjóra félagslegra verkefna, að þeir starfi út samningstímann. Íslendingar hófu þróunarsamvinnu við Namibíu sama ár og landið fékk sjálfstæði frá Suður-Afríku, árið 1990.