Fagnar með Dwight Yorke

„Ég ákvað að skella mér út. Það var skyndiákvörðun, það er alltaf skemmtilegast," segir fyrirsætan og neminn Kristrún Ösp Barkardóttir.

Kristrún flaug út til London í morgun í boði fótboltakappans Dwight Yorke. Born to Score, ævisaga Yorke, kom út í gær og Kristrún hyggst fagna útgáfunni með honum um helgina. Þau eru góðir vinir og hafa hist reglulega undanfarin misseri. Yorke er þekktur markaskorari og hefur spilað með liðum á borð við Aston Villa og Manchester United. Hann lagði nýlega skóna á hilluna.

Kristrún er spennt fyrir ferðinni og segir að hver dagur sé ævintýri með fótboltakappanum. „Við förum í partí á laugardagskvöldið og út að borða og svona. Ég veit ekki hvað við gerum á sunnudaginn," segir hún. „Það er yfirleitt prógramm allan tímann og við gerum alltaf eitthvað nýtt sem ég hef ekki gert áður."

Breska pressan er þekkt fyrir aðgangshörku, en Kristrún segir að þau séu að mestu látin í friði þar sem hann er hættur að spila. „Það er samt alltaf eitthvað aðeins," segir hann. „En við fáum alls staðar athygli sem við förum."

Það má þó búast við að athyglin aukist um helgina, þar sem fjölmiðlar hafa hreinlega étið upp það sem Yorke segir í ævisögunni um samband sitt við glamúrfyrirsætuna Katie Price, einnig þekkta sem Jordan. Þau áttu í ástarsambandi fyrir nokkrum árum og eignuðust soninn Harvey. Jordan hefur sakað Yorke um að taka ekki þátt í uppeldinu, en hann sakar hana um að leyfa sér það ekki.

Yorke talar opinskátt um kynlíf sitt og Jordan í bókinni. Hann segir meðal annars að hún hafi verið tvískiptur persónuleiki í rúminu; verið ljúf sem Katie Price og afar kinkí sem Jordan. Jordan er gríðarlega þekkt í Bretlandi. Hún hefur sent frá sér bækur, nærfatalínur og margt fleira ásamt því að hafa setið nakin fyrir í fjölmörgum tímaritum.

Jordan hóf feril sinn á síðu 3 í breska götublaðinu The Sun, en Kristrúnu hefur einnig verið boðið að sitja þar fyrir. „Ég ætla aðeins að bíða með það. Gera þetta frekar rétt og vel," segir hún. Stúlkurnar á síðu 3 sitja fyrir berbrjósta, en ætli Kristrún sé ekkert feimin? „Nei, ekkert feimin, ekki til í mér!"atlifannar@frettabladid.is