Ábyrgð Tryggingarsjóðs var fegruð fyrir innistæðueigendum

Upplýsingar um ábyrgð Tryggingarsjóðs innistæðueigenda voru fegraðar á enskri útgáfu heimasíðu sjóðsins. Þetta kemur fram í pistli stærðfræðingsins Pawels Bartoszek á Deiglan.com í dag.

Í íslenskum lögum um Tryggingarsjóðinn kemur fram að telji stjórn sjóðsins ríka ástæðu til sé henni heimilt að taka lán til að greiða kröfuhöfum ef eignir sjóðsins hrökkva ekki til. Ensk þýðing á lagabókstafnum er svipaðs eðlis, svo og íslenska útgáfa heimasíðu Tryggingarsjóðs.

Á enskri útgáfu heimasíðu Tryggingarsjóðsins, tryggingarsjodur.is, er hins vegar dýpra tekið í árinni. Þar segir: „If the total assets of the Fund prove insufficient, the Fund will borrow funds in order to compensate losses suffered by claimants."

Segir Pawel að í þýðingunni hafi verið gengið miklu lengra í að sannfæra fólk um að lán yrði tekið til að greiða út innistæðutryggingar heldur en gert er í íslensku útgáfunni og raunar mun lengra en íslensk lög gefa tilefni til.

Í lögfræðiáliti sem Logos vann um réttarstöðu íslenska ríkisins í Icesave deilunni þann 20. október 2008 kemur fram að vefsetur Icesave í Bretlandi hafi vísað á þessa ensku útgáfu heimasíðunnar. Þar er gerð athugasemd við þetta misræmi.

Þar segir jafnframt að langflestir innlánseigendur Icesave munu hafa lesið ensku útgáfuna, ef þeir hafa kynnt sér leiðbeninginar Tryggingarsjóðs á annað borð.

Í samtali við fréttastofu segir Pawel hugsanlegt að um saklaus mistök sé að ræða. Hann segir þó að hið versta sem hann gæti ímyndað sér væri ef upplýsingunum hefði verið breytt að beiðni íslenskra lánastofnana.

Pistil Pawels má lesa hér.