Fyrsti dómur vegna bankahrunsins fellur á miðvikudaginn

Fyrsti dómur í málum gegn bönkunum eftir bankahrunið mun falla í Héraðsdómi Reykjavíkur þann 7. október næstkomandi. Um er að ræða mál gegn gamla Landsbankanum og Landsvaka, sem var vörsluaðili peningamarkassjóða Landsbankans.

Vísir hefur áður greint frá þessum málaferlum. Þegar peningamarkaðssjóðunum var slitið eftir hrun Landsbankans í október varð ljóst að veruleg skerðing varð á eignum þeirra sem áttu hluti í sjóðnum, en eigendur fengu einungis tæp 69% af eigum sínum greiddar til baka. Hópur hlutdeildarskirteinishafa í peningamarkaðssjóðunum ákvað því að stefna Landsbankanum og Landsvaka vegna málsins. Meðal annars vegna þess að ófullnægjandi upplýsingar hafi verið um fjárfestingastefnu sjóðanna.

Jóhann Hafstein lögmaður sem flytur málin segist ekki kannast við að áður hafi fallið dómar sem rekja megi til bankahrunsins. „Það er ekkert mál sem ég man eftir að ég hafi heyrt um. Ekki nema úrskurðir og einhver frávísunarmál," segir Jóhann Hafstein.