Fjögur hundruð milljónum varið í Óskarsherferð

„Þetta kostar aukapening en við höfum fengið það góð og jákvæð viðbrögð við myndinni að við töldum raunhæft að herja sérstaklega á þennan hóp,“ segir Sigurjón Sighvatsson, kvikmyndaframleiðandi í Hollywood. Kvikmyndin Brothers, sem Sigurjón framleiðir, fer í svokallaða Óskarsverðlauna-herferð. Það þýðir að hún verður markaðssett sérstaklega fyrir þá sem hafa atkvæðisrétt á Óskarsverðlaununum, svokallaða Akademíu, og annað áhrifamikið fólk innan kvikmyndabransans. Greinar og viðtöl verða birt í fagtímaritum um myndina og forsýningar haldnar þar sem þessum hópi verður boðið sérstaklega.

Að sögn Sigurjóns kostar herferð á borð við þessa þrjár milljónir dollara, eða tæplega fjögur hundruð milljónir íslenskra króna. „Við verðum því með tvær herferðir í gangi, annars vegar fyrir almenning og hins vegar fyrir þennan faghóp. Markaðsherferðin í heild sinni mun því ekki kosta undir 23 milljónum dollara,“ útskýrir Sigurjón en það gerir litla þrjá milljarða íslenskra króna.

Sigurjón segir óvanalegt að jafn alvarlegri mynd og Brothers sé dreift í almenn kvikmyndahús en myndin verður frumsýnd í átján hundruð bíósölum víðs vegar um Ameríku í byrjun desember.

„Við erum auðvitað að taka áhættu með þessu, venjulega er bara takmarkaður hópur sem vill sjá svona myndir.“ Sigurjón útskýrir að auglýsingaherferðin einblíni nú aðallega á þann ástarþríhyrning sem sé fyrirferðarmikill í myndinni en minna á stríðið í Afganistan en það hefur þó mikil áhrif á líf aðalpersónanna. Með helstu hlutverk fara þau Natalie Portman, Jake Gyllenhaal og Tobey Maguire en leikstjóri er Jim Sheridan. U2 semur síðan sérstakt titillag myndarinnar.

Sigurjón segir að ef allt gangi að óskum og herferðin heppnist vel geti þau ef til vill uppskorið fimm til sex tilnefningar. Slík uppskera krefjist þess hins vegar að lukkudísirnar séu á þeirra bandi. „Það er margt sem vinnur með okkur, umræðan um stríðið í Afganistan, þrír ungir leikarar sem njóta mikillar hylli og svo leikstjóri sem hefur verið tilnefndur sex sinnum til þessara verðlauna en aldrei fengið. Ég er þó búinn að vera nógu lengi í þessum kvikmyndabransa til að vita að það getur brugðið til beggja vona.“

freyrgigja@frettabladid.is