Flestir taka Skúla rafvirkja

„Það borgar sig kannski að segja sem minnst því við erum alltaf reknir í miðjum klíðum, en jú, meiningin er að þetta sé útsláttarkeppni og að lokum standi einn sigurvegari uppi,“ segir Þórður Helgi Þórðarson, Doddi litli, um eftirhermukeppnina Laddinn 2009, sem stendur nú yfir í Litlu hafmeyjunni, þætti Dodda og Andra Freys Viðarsonar. Þátturinn er á dagskrá á föstudagskvöldum á Rás 2 á milli kl. 19.30 og 22. „Tveir keppendur mætast og fá 90 sekúndur, og svo 30 sekúndur á mann, til að reyna að slá í gegn með eftirhermum úr karaktera-galleríi Ladda. Menn spinna bara og flestir hafa tekið Skúla rafvirkja. Olli með „oj oj oj“-ið er líka vinsæll og svo detta margir í Skrám í restina – „jóla hvað?“ Menn eru hins vegar alveg hættir að taka Evu Lund.“

Hlustendur eru dómarar, fyrri keppandinn sem fær stig frá fimm hlustendum vinnur keppni kvöldsins. „Í fyrstu keppninni vann Bjarni töframaður Sveppa. Sveppi var reyndar mjög fyndinn en bara léleg eftirherma. Bjarni var aftur á móti lang besta eftirherman til þessa. Hann var mættur hálftíma fyrr til að æfa sig og var að skrifa niður í bók. Flestir aðrir hafa nú bara mætt og rennt sér í þetta óundirbúnir,“ segir Doddi. „Í öðrum þætti vann Steinn Ármann Gunnar Helgason, svo vann Eyþór Ingi söngvari Steina sleggju, og síðast vann Helgi Seljan fréttamaður Pétur Jóhann leikara. Það má deila um það hversu sanngjarnt það var. Það var mikið hringt frá Reyðarfirði.“

Í kvöld keppa Auddi Blöndal og Guðmundur Franklín, en á hann var bent með tölvupósti. „Þessi hugmynd kviknaði nú bara sem eitthvað djók í Frey Eyjólfssyni, en ég greip hana á lofti,“ segir Doddi. „Við sendum öllum frægum vinum okkar fyrirspurn á Facebook og við erum búnir að melda nokkra á kantinn, til að mynda Helgu Brögu og Karl Örvarsson.“

Ef planið gengur eftir munu sextán keppendur reyna sig áður en Laddinn 2009 dettur í undanúrslit. Doddi segir að í kvöld verði einnig boðið upp á Leikjahorn Soffíu sætu og Hæfileikalandið.- drg