Ian Wright: Owen verður að velja á milli boltans og hestanna

Ian Wright, fyrrum leikmaður Arsenal og enska landsliðsins, segir að honum sárni við að sjá feril Michael Owen dala eins og hann hefur gert undanfarin ár.

Owen hefur lítið spilað með Newcastle að undanförnu en hann hefur ítrekað átt við meiðsli að stríða. Enska landsliðið á í miklum vandræðum með sóknarmenn eftir að þeir Emile Heskey og Carlton Cole meiddust um helgina. Jafnvel þótt að Peter Crouch væri tæpur ákvað Fabio Capello landsliðsþjálfari að kalla aðeins á einn sóknarmann til viðbótar - Darren Bent hjá Tottenham.

Michael Owen vantar aðeins níu mörk upp á að jafna markamet Bobby Charlton sem skoraði 49 mörk með enska landsliðinu á sínum tíma. En Owen virðist einfaldlega ekki í myndinni hjá Capello.

„Hann hefur nægan tíma eftir að knattspyrnuferlinum lýkur til að hugsa um hestana sína," sagði Wright í samtali við götublaðið The Sun í dag.

„En eins og málin standa nú efast ég um að hann geti ógnað meti Charlton því ferillinn hans er á niðurleið. Ég skil Capello vel enda er Owen hvorki í góðu leikformi né góðu líkamlegu formi. Hann á meira að segja erfitt með að komast í byrjunarlið Newcastle og líkist engan veginn þeim Owen sem við þekktum áður."

„Ég hef verið mikill aðdáandi Michael Owen í gegnum tíðina en í dag er ég hans harðasti gagnrýnandi."

„Hann ætti að einbeita sér að knattspyrnunni fyrst og fremst. Við þurfum á Owen að halda fyrir HM í Suður-Afríku á næsta ári. Hann þarf að taka sér David Beckham til fyrirmyndar. Beckham fór til Bandaríkjanna og áttaði sig á því að hann gerði risastór mistök.

Því fór hann til AC Milan og vann sér aftur sæti í enska landsliðinu. Það er hægt að segja ýmislegt um Beckham en enginn getur neitað því að hann elskar að spila fyrir hönd þjóðar sinnar."

Samningur Owen við Newcastle rennur út í sumar og segir Wright að hann verði að finna sér nýja áskorun.

„Hann verður að taka sig taki, koma sér í stand og finna sitt gamla form. Aðeins þá má hann eiga von á því að kallið komi loksins."