Larsson lék kveðjuleikinn í gær - keppnistreyjan hans hengd upp

Það var dramatísk stund á Olympia-leikvanginum í Helsingborg í gærkvöldi þegar marvarðahrellirinn Henrik „Henke" Larsson lék lokaleik sinn á ferlinum þegar Helsingborg tók á móti Djurgarden.

Ólafur Ingi Skúlason var í byrjunarliði Helsingborg en liðið tapaði leiknum 0-2 en þrátt fyrir úrslitin var staðið upp og fagnað fyrir Larsson í leikslok.

Eftir leikinn var haldin smá athöfn til heiðurs Larsson þar sem keppnistreyja hans var formlega hengd upp og númerið 17 verður núna tekið úr umferð hjá félaginu.

Þá var spilað myndband þar sem menn á borð við Lars Lagerback, fyrrum landsliðsþjálfari Svía, Sir Alex Ferguson, knattspyrnustjóri Manchester United og Zlatan Ibrahimovic, leikmaður Barcelona og sænska landsliðsins, hylltu Larsson með fögrum orðum.

„Það var ömurlegt að enda þetta með tapi en þrátt fyrir að ég reyni nú yfirleitt að halda andlitinu þá er erfitt að bregðast við því þegar manni er sýnd svona mikil ást eins og hér í kvöld. Ég er bara gráti næst," sagði Larsson að tilefninu.

Hinn 38 Larsson skoraði yfir 300 mörk á glæsilegum ferli sínum með liðum á borð við Feyenoord, Celtic, Manchester United og Barcelona auk þess að spila með Helsingborg og Högaborg í heimalandinu og sænska landsliðinu.