Ísland fer ekki á HM - tap í Makedóníu

Ísland tapaði í dag, 2-0, fyrir Makedóníu ytra í undankeppni HM 2010. Þar með er ljóst að þeir litlu möguleikar sem Ísland átti á að komast í úrslitakeppni HM í Suður-Afríku eru ekki lengur fyrir hendi.

Leikurinn var nokkuð bragðdaufur og þá sér í lagi síðari hálfleikurinn. Ísland átti varla færi í þeim síðari og ekki voru þau mörg í þeim fyrri. Varnarleikur íslenska liðsins var þokkalegur og þá sér í lagi markvarsla Gunnleifs Gunnleifssonar sem var eins og svo oft áður besti leikmaður íslenska liðsins.

Aco Stojkov skoraði fyrra mark Makedóna á tíundu mínútu leiksins með skalla og varamaðurinn Filip Ivanovski innsiglaði sigurinn með marki af stuttu færi á 86. mínútu.

Flestir leikmenn íslenska liðsins náðu sér ekki á strik í dag. Kristján Örn Sigurðsson átti sem fyrr fínan leik í hjarta íslensku varnarinnar og félagar hans í vörninni sluppu ágætlega frá sínu ef frá eru talin nokkur mistök sem reyndust stundum dýrkeypt.

Miðjuspil íslenska liðsins var nánast ekki til staðar í leiknum en þeir Brynjar Björn Gunnarsson og Stefán Gíslason voru aðallega að hjálpa til í vörninni. Eggert Gunnþór Jónsson var einnig nokkuð duglegur á miðjunni en hjálpaði sóknarleiknum lítið.

Emil Hallfreðsson var ágætur í fyrri hálfleik en Pálmi Rafn Pálmason náði sér ekki á strik. Arnór Smárason fékk úr litlu að moða og gat lítið gert í þau skipti sem hann fékk boltann.

Leiknum var lýst beint á Boltavakt Vísis og Fréttablaðsins og má lesa hana hér: Ísland - Makedónía.