Theodór ætlar að vera maður leiksins gegn Skotum

Theodór Elmar Bjarnason virðist vera í landsliðshópnum fyrir Skotaleikinn, sem verður tilkynntur á morgun, því hann talar um leikinn mikilvæga við skoska fjölmiðla í dag.

Theodór Elmar fékk aldrei almennilegt tækifæri hjá Celtic undir stjórn Gordons Strachan og hann ætlar að sýna Strachan og fólki í Skotlandi í landsleiknum á Hampden Park að hann hefði vel getað staðið sig hjá félaginu.

„Ég hef aukahvatningu fyrir þennan leik. Markmiðið er að mæta á völlinn og vera valinn maður leiksins. Ég ætla að sýna og sanna að ég hefði getað gert það gott með Celtic," sagði Theodór Elmar.

Síðast þegar hann kom á Hampden Park var hann í bikarúrslitaleik með Celtic gegn Dunfermline. Hann var búinn að hita upp og kominn úr þegar Dunfermline skoraði. Strachan bað hann í kjölfarið að fá sér aftur sæti. Það var í síðasta skipti sem Elmar sást í búningi Celtic.

„Ég get ekki beðið eftir Skotaleiknum því ég missti af þessum bikarúrslitaleik og var miður mín. Það var Martin O´Neill sem fékk mig til Celtic en Strachan gaf mér aldrei tækifæri," sagði Theodór Elmar.