Símun: Verður gaman að stríða strákunum

Símun Samuelsen var vitanlega ánægður með sigur sinna manna í færeyska landsliðinu gegn því íslenska í dag.

Símun var með leikreyndari leikmönnum landsliðsins í dag og aðeins einn þriggja sem átti meira en tíu leiki að baki. Íslenska liðið var einnig skipað ungum og óreyndum leikmönnum.

„Þetta var sanngjarn sigur að mínu mati," sagði Símun eftir leik en hann leikur með Keflavík hér á landi. „Við byrjuðum vel og skoruðum tvö mörk í fyrri hálfleik. Það gerði það að verkum að við gátum leyft okkur að liggja til baka í þeim síðari og gera leikinn leiðinlegan - sem og við gerðum. Við náðum svo að halda hreinu allt þar til á 90. mínútu."

„En svo má ekki gleyma því að markvörðurinn okkar (Gunnar Nielsen) var mjög góður. Þetta var hans fyrsti A-landsleikur og stóð hann sig gríðarlega vel."

Símun fer nú aftur til Keflavíkur þar sem undirbúningstímabilið heldur áfram og sagðist hann hlakka til að hitta félaga sína.

„Það verður gaman að geta strítt þeim á þessu - kannski sérstaklega Gaua sem skoraði meira að segja fyrir okkur," sagði hann og hló. Vísaði hann til þess að félagi hans hjá Keflavík, Guðjón Árni Antoníusson, skoraði sjálfsmark í leiknum. „En þetta var auðvitað alger óheppni hjá honum. Guðjón Árni átti góðan leik."