19 stuðningsmenn létust á Fílabeinsströndinni - Drogba skoraði tvö

Óttast er að minnsta kosti nítján manns hafi látið lífið rétt fyrir leik Fílabeinsstrandarinnar og Malawi í undankeppni HM í dag. Atvikið átti sér stað þegar áhorfendur létu ófriðlega, með þeim afleiðingum að veggur hrundi.

Lögregla beitti táragasi til að dreifa skaranum sem gerði illt verra. Fólk varð órótt og leiddi það til fleiri meiðsla í ólátum.

Slík atvik eru ekki ný af nálinni á landsleikjum í Afríku undanfarinn áratug. Tvö svipuð atvik áttu sér stað í Zambíu og þá dóu þrettán manns í Zimbabve fyrir þremur arum síðar.

Samt sem áður verður Heimsmeistaramótið haldið í Suður-Afríku á næsta ári. FIFA hefur farið reglulega yfir reglur og öryggisatriði í landinu til að tryggja að allt fari vel fram á næsta ári.

Þótt ótrúlegt megi virðast fór leikurinn fram. Fílabeinsströndin vann leikinn 5-0 þar sem Didier Drogba skoraði tvö mörk og Salomon Kalou, Bakary Kone og Christian Koffi Ndri sitt markið hver.