Kosningakerfi Alþingis stíflað vegna grófrar neftóbaksneyslu

Þingmaður Hreyfingarinnar, Margrét Tryggvadóttir hélt ræðu á Alþingi undir liðnum störf Alþingis fyrr í dag og gagnrýndi þar harðlega neftóbaksneyslu þingmanna. Afleiðingar þessarar neyslu er meðal annars að kosningakerfi Alþingis virkar ekki alltaf sem skyldi vegna þess að kosningahnappar tóbaksþingmannanna stíflast af grófum kornum tóbaksins.

„Það er ótrúlega mikið um þetta. Maður hefði aldrei trúað því," segir Margrét um þennan slæma ávana þingmanna en svo mikið er um þetta að hún sá sig knúna til þess að halda ræðu og hvetja þingmenn til þess að leggja af þessum ósið.

„Mér finnst þetta ógeðslegt en það er náttúrulega smekksatriði," segir Margrét og bendir á að það sé talsvert ónæði af tóbakinu. Meðal annars sé mikil og sterk lykt af því. Hún bendir þó á að sumir þingmenn fara ágætlega með þetta. Aðrir talsvert verr.

Allir þeir sem neyta tóbaksins eru karlmenn að sögn Margrétar. Hún bendir svo á að þingmenn mega ekki fara með mat inn í salinn né drykki utan vatns. Þá má ekki reykja inn í byggingunni, „og mér finnst að þessi tóbaksnotkun ætti líka að vera bönnuð," segir Margrét sem hefur skorið upp herör gegn tóbaksunnendum þingsins.

Þess má geta að neftóbak er meinlegt heilsu manna. Á Vísindavef Háskóla Íslands segir eftirfarandi:

„Í einum skammti af reyklausu tóbaki er mörgum sinnum meira magn af nikótíni en í einni sterkri sígarettu. Nikótín er eitt kröftugasta fíkniefni sem þekkt er og er sennilega enn meira vanabindandi en efni á borð við heróín og kókaín.

Nikótín hefur margvísleg áhrif á líkamann sem öll verður að telja skaðleg. Það örvar hjartað og veldur æðasamdrætti en í sameiningu leiðir þetta til hækkaðs blóðþrýstings og getur þar verið um verulega hækkun að ræða. Hækkaður blóðþrýstingur eykur álag á hjarta og æðar og getur leitt til hjarta- og æðasjúkdóma, meðal annars kransæðasjúkdóms."