Gekk út af Antichrist á meðan Bryndís sat áfram

„Þetta var bara viðbjóður. Hann er greinilega ekki með réttu ráði höfundurinn,“ segir Jón Baldvin Hannibalsson, fyrrverandi utanríkisráðherra, sem gekk út af Antichrist, nýjustu mynd Lars von Trier, í Háskólabíói um síðustu helgi.

Antichrist var nýlega sýnd á kvikmyndahátíðinni í Toronto og á einni sýningunni kastaði bíógestur upp á fólkið fyrir framan sig. Kemur það ekki á óvart því í myndinni tekur kona upp á því að merja kynfæri eiginmanns síns með viðardrumbi. Eftir það tekur hún upp verkfæri, borar holu í gegnum kálfann á honum og festir myllustein við legg hans. Skömmu síðar tekur konan upp skæri og framkvæmir umskurð á sjálfri sér.

„Mér varð ekki bumbult. Ég er lífsreyndur maður en þetta er ekki mönnum bjóðandi,“ segir Jón Baldvin og viðurkennir að þetta sé ógeðslegasta mynd sem hann hafi séð. „Að búa til mynd þar sem söguefnið sýnir að konur séu illar og fabúlera um það út frá nornabrennuöld. Þetta væri efniviður sem maður með fullu viti gæti gert úr góða mynd en því miður, hann bara klúðraði þessu. Ég held að hann hafi dottið í það og að það sé ekki runnið af honum.“

Eiginkonan Jóns, Bryndís Schram, sat aftur á móti sem fastast í salnum og kláraði myndina þrátt fyrir að líða illa. „Ég varð nú að sjá hvernig myndin endaði. Ég hélt þetta út en var lengi að jafna mig. Við vorum búin að hugsa okkur að koma við einhvers staðar á leiðinni heim en maður varð að fara beint heim. Það var mjög erfið reynsla að fara í gegnum þessa mynd,“ segir Bryndís og bætir við að henni hafi verið illt, bæði andlega og líkamlega. „Ég hellti í mig brennivíni þegar ég kom heim, bara til að hrista upp í mér og fá doðann úr líkamanum.“ Hún láir manni sínum ekki að hafa yfirgefið salinn, sem líklega hafi verið það hárrétta í stöðunni: „Hann missti náttúrlega af endinum, sem er hryllilegastur af öllu.“