Scolari vill ljúka ferlinum í heimalandinu

Brasilíski þjálfarinn Luiz Felipe Scolari er enn í London þó hann hafi verið rekinn frá Chelsea eftir aðeins sjö mánuði í starfi.

Hinn sextugi Scolari hefur verið orðaður við mörg lið síðan hann lét af störfum en hann segist sjálfur hafa mestan hug á því að ljúka ferlinum í heimalandinu. Þá dettur honum helst í hug gamla félagið hans Gremio sem hann stýrði á tíunda áratugnum.

"Ég vil helst ljúka ferlinum hjá Gremio. Það er félagið sem ég hef elskað síðan ég var barn og ég starfaði þar í tvígang með góðum árangri. Ég veit samt ekki hvar ég mun ljúka ferlinum," sagði Scolari og bætti við að hann væri ekki að reyna að moka undan núverandi þjálfara liðsins með orðum sínum.