Norskur framherji á leið til FH

Norski framherjinn Alexander Söderlund mun að öllu óbreyttu ganga til liðs við FH og leika með félaginu nú í sumar.

Þetta staðfesti Jón Rúnar Halldórsson, formaður knattspyrnudeildar FH, í samtali við Vísi í dag. „Það er í rauninni allt tilbúið," sagði Jón Rúnar. „Allir aðilar búnir að samþykkja allt. Það vantar bara undirskriftirnar."

Söderlund er 21 árs gamall en hefur þó ferðast víða. Hann hóf feril sinn hjá Vard Haugasund í heimalandi sínu en var þá fenginn til ítalska B-deildarliðsins Treviso. Honum hefur þó ekki tekist að vinna sér sæti í aðalliðinu þar.

Í fyrra var hann lánaður til belgíska B-deildarliðsins Union Royala Namur þar sem hann kom við sögu í fáeinum leikjum en náði ekki að skora. Nú í janúar var hann svo lánaður til Botev Plovdiv sem leikur í búlgörsku úrvalsdeildinni.

Hann lék með FH í einum æfingaleik og þótti standa sig vel. „Heimi (Guðjónssyni, þjálfara FH) leist vel á hann og það er það sem telur," sagði Jón Rúnar.