Kylie í íslenskum skóm á tónleikaferð um heiminn

„Ég get varla verið annað en í skýjunum yfir að svona heimsfræg kona skuli hafa samband og sækjast eftir því að fá að vera í hönnuninni minni við svona stórt tilefni," segir hönnuðurinn Sigrún Lilja Guðjónsdóttir.

Ástralska söngkonan Kylie Minogue klæðist skóm og beltum úr íslensku fylgihlutalínunni Gyðja Collection á tónleikaferðalagi um heiminn á næsta ári, ásamt því að bera töskur frá merkinu. Tónleikarnir verða gefnir út á DVD og Kylie verður klædd í línuna á forsíðu hulstursins. Stílisti stjörnunnar hitti forsvarsmenn Gyðju á fundi í París á dögunum þar sem skrifað var undir samninga. Stílistinn gerði einnig samninga við merki á borð við Dior og Oscar de la Renta um klæðnaðinn sem verður undir íslensku fylgihlutunum frá Gyðju.

„Kylie og stílistinn hennar sáu bækling frá okkur og örfáum dögum seinna var haldinn fundur þar sem öll smáatriði voru rædd," segir Sigrún Lilja. „Þetta er tónleikaferðalag sem byrjar í febrúar 2010 og verða að öllum líkindum tíu mjög stórir tónleikar."

Íslendingar kynntust fyrst Kylie Minogue þegar hún lék Charlene í áströlsku sápuóperunni Neighbours. Í dag er hún ein vinsælasta söngkona heims og fastagestur á listum yfir kynþokkafyllstu konur heims. Þetta er ekki í fyrsta skipti sem Kylie sýnir Íslendingum áhuga því Emilíana Torrini samdi með henni smellinn Slow, sem kom út árið 2003. Kylie vinnur nú að sinni elleftu breiðskífu, en hún gaf síðast út X árið 2007. Eitt af þekktustu lögum Kylie Minogue er Can't Get You out of My Head, en það fór á toppinn í 40 löndum og meira en fjórar milljónir eintaka seldust af smáskífunni um allan heim.

Gyðja Collection er íslensk hönnunarlína sem samanstendur af skóm, töskum, beltum og öðrum fylgihlutum. Nýja línan kom í íslenskar verslanir í gær og fæst meðal annars í versluninni Steinar Waage í Kringlunni. Nánari upplýsingar má finna á gydja.is.

atlifannar@frettabladid.is