Barry í viðræðum við City

Enska úrvalsdeildarfélagið Aston Villa hefur staðfest að miðjumaðurinn Gareth Barry hafi fengið leyfi til þess að ræða við Manchester City.

Núgildandi samningur Barry við Aston Villa rennur út í lok næsta keppnistímabils en leikmaðurinn hefur fram til þessa ekki verið viljugur að framlengja hann þrátt fyrir ítrekuð boð stjórnar Aston Villa.

Allt leit út fyrir að fararsnið yrði á Barry fyrir síðasta keppnistímabil en þá voru félög á borð við Liverpool á eftir kappanum en Aston Villa verðlagði hann þá á 18 milljónir punda, sem var nóg til þess að félög kældu áhuga sinn á enska landsliðsmanninum.

Barry hefur líst yfir löngun sinni til þess að spila í Meistaradeildinni en Aston Villa varð að láta í minni pokann fyrir Arsenal í baráttunni um það á nýafstaðinni leiktíð. Manchester City náði hins vegar ekki einu sinni að tryggja sér þátttökurétt í UEFA Europa League, líkt og Aston Villa, en peningarnir eru vissulega til staðar í herbúðum City eftir að Sheikh Mansour eignaðist félagið á síðasta ári.

Sky Sports fréttastofan hefur heimildir fyrir því að Barry fari í læknisskoðun hjá City í dag eftir að Aston Villa samþykkti kauptilboð sem nemur um 11 milljónum punda.