Barry kominn til Manchester City

Manchester City hefur gengið frá kaupunum á Gareth Barry frá Aston Villa fyrir tólf milljónir punda.

Fyrr í dag hóf Barry viðræður við fulltrúa City og gekkst undir læknisskoðun sem hann hefur nú staðist, eftir því sem fram hefur komið í enskum fjölmiðlum.

Barry átti eitt ár eftir af samningi sínum við Villa og var sterklega orðaður við Liverpool fyrir síðasta keppnistímabil. Liverpool bauð nokkrum sinnum í hann en Aston Villa vildi fá átján milljónir fyrir hann. Liverpool var ekki reiðubúið að borga svo mikið.

Barry hefur verið í herbúðum Aston Villa undanfarin ellefu ár og hafði ávallt lýst því yfir að hann þrái að spila í Meistaradeild Evrópu. Það verður bið á því, í eitt ár til viðbótar að minnsta kosti.