Vilhjálmur fær gögn um lán

Skilanefnd Glitnis á að afhenda Vilhjálmi Bjarnasyni, lektor og fjárfesti, upplýsingar um 24 milljarða króna veðlaust lán Glitnis til fjárfestingarfélagsins Fons. Þrotabú Fons þarf hins vegar ekki að afhenda Vilhjálmi sambærileg gögn.

Vilhjálmur kveðst ætla að skoða gögnin með mögulega skaðabótaábyrgð stjórnenda í huga. Hann útilokar því ekki að höfða mál að nýju, gefi gögnin tilefni til þess. Vilhjálmur stefndi bæði skilanefnd Glitnis og þrotabúi Fons. Anna M. Karlsdóttir kvað upp úrskurð í málinu um miðjan dag í gær.

„Bankaleynd nær ekki út yfir gröf og dauða," segir Guðni Ásþór Haraldsson, lögmaður Vilhjálms.

Í úrskurði Héraðsdóms segir að bankaleynd sé fyrst og fremst ætlað að vernda viðskipta­hagsmuni viðskiptavinar fjármálafyrirtækis, en ekki hagsmuni fjármálafyrirtækisins. „Ljóst er að sá viðskiptavinur sem hér um ræðir er gjaldþrota og erfitt að sjá hvaða hagsmuni hann hefur af því að þeim upplýsingum sem hér er beðið um, sé haldið leyndum. Þá er að líta til þeirrar yfirlýsingar þrotabúsins að það taki enga afstöðu varðandi það hvort varnar­aðilinn Glitnir banki hf. veiti sóknar­aðila aðgang að gögnunum," segir þar.

Vilhjálmur segir dóminn vissulega marka ákveðin tímamót hvað varði túlkun á ákvæðum um bankaleynd. „Þegar viðskiptavinurinn hverfur er bankaleynd aflétt og þegar þetta er komið yfir í þrotabú þá eru gögnin nánast orðin opinber," segir hann og býr sig undir að fara yfir þau gögn sem skilanefndinni hefur verið gert að afhenda. „Ég vonast til að sjá hvernig það má vera að fyrirtæki fær 24 milljarða að láni án nokkurra trygginga og þá get ég kannski séð ákveðið mynstur, en það sem ég horfi í er hugsanleg skaðabótaábyrgð stjórnenda bankans vegna vanrækslu." - óká