Sigurður Ragnar: Frammistaða liðsins var mjög góð

Sigurður Ragnar Eyjólfsson, kvennalandsliðsþjálfari, var ánægður með sínar stelpur þrátt fyrir að liðið þyrfti að sætta sig við þriðja tapið í jafnmörgum leikjum í lokaleiknum sínum á EM á móti Þýskalandi í dag.

„Ég held að við getum verið mjög stolt af frammistöðunni því það er ekki aðalatriðið hvort við höfum fengið núll stig eða eitt stig út úr þessum leik. Frammistaða liðsins var mjög góð," sagði Sigurður Ragnar.

„Þjóðverjar fóru í leikinn til þess að meiðast ekki og fá ekki spjöld. Samt sem áður vildu þær ekki breyta byrjunarliðinu mjög mikið og það var helmingur þess sem byrjaði þennan leik. Svo settu þær inn á Inku Grings sem er þeirra aðalmarkaskorari og hún skoraði markið," sagði Sigurður Ragnar og bætti við:

„Þær lentu í erfiðum leik á móti mjög baráttuglöðu íslensku liði. Ég held að leikurinn hafi tekið einhvern toll af þeim fyrir framhaldið. Ég á von á því að þýska liðið fari alla leið í úrslitaleikinn en ég held að það tapi þar fyrir Svíþjóð," sagði Sigurður Ragnar.

„Bæði þessi leikur og mótið gefur okkur mikið sjálfstraust fyrir framtíðina. Við sjáum að við eigum fyllilega heima á þessu móti. Við erum inn í öllum leikjunum, fáum góð marktækifæri og skorum á móti Frökkum. Það er margt sem við getum tekið með okkur úr keppninni," sagði þjálfarinn.