Orkuskattur leggist ekki á nýfjárfestingu

Fyrirhugaðir orku-, umhverfis- og auðlindaskattar, sem samkvæmt fjárlagafrumvarpinu eiga að skila ríkissjóði sextán milljörðum króna í tekjur á næsta ári, veikja samkeppnisstöðu Íslands og munu vega þungt í ákvörðunum útlendinga um fjárfestingar á Íslandi.

Þetta segir Þórður H. Hilmarsson, forstöðumaður Fjárfestingarstofunnar, sem hefur það hlutverk að laða erlenda fjárfesta til landsins. Útflutningsráð og iðnaðarráðuneytið starfrækja Fjárfestingarstofuna.

Björn Valur Gíslason, þingmaður VG og varaformaður fjárlaganefndar, segir rætt um að veita nýfjárfestum skattalegt hagræði svo laða megi erlenda fjárfestingu til landsins. Slíkt hagræði gæti verið í gildi í nokkur ár.

Í Morgunblaðinu í gær upplýsti Eyjólfur Árni Rafnsson, forstjóri verkfræðistofunnar Mannvits, að erlend fyrirtæki sem hefðu undirbúið sjö ólík verkefni hér á landi, öll grundvölluð á orkunýtingu, hefðu sett áform sín í biðstöðu þegar þeim hefði orðið ljóst að í bígerð væri að leggja á sérstakan orkuskatt.

Þórður H. Hilmarsson segir erlenda aðila ekkert ákveða um fjárfestingar hér fyrr en fyrir liggi hvernig fyrirhugaðri skattlagningu verði háttað. Ákvarðanaferlið sé jafnan viðkvæmt og breytingar á viðskiptaumhverfinu séu til baga. Spurður hvort „hófsamir“ skattar, eins og stjórnvöld hafa nefnt fyrirhugaða skattlagningu, fæli fjárfesta frá segist Þórður spyrja á móti hvað sé hófsamt. Auk þess sé ávallt hætt við að skattar sem þessir hækki. Tónninn hafi verið gefinn.

Björn Valur Gíslason bendir á að tekjuskattur fyrirtækja á Íslandi sé lægri en almennt gerist annars staðar og muni þar talsverðu. Vel megi hugsa sér, og það sé raunar til skoðunar, að veita erlendum aðilum sem hyggi á nýfjárfestingar tímabundnar skattaívilnanir en ófært sé að fyrirtæki sem hér hafi starfað telji sig ekki fær um að taka þátt í endurreisn samfélagsins. „Stóriðjan, til dæmis, segist í einu orðinu vera samfélaginu mikilvæg og nánast ómissandi en í hinu orðinu segist hún ekki geta tekið þátt í að losa okkur út úr þessum vandræðum. Hótanir manna um að hér fari allt til fjandans ef þeir fá ekki sínu framgengt eru ekki boðlegar.

Stóriðja, útgerð og aðrir ættu að koma að þessu borði frekar en að setja alltaf hnefann í það.“ bjorn@frettabladid.is