Sækir innblástur í kreppuna

Guðmundur Atlason tók aftur upp pensilinn í vor eftir langt hlé. Hann málar í popplistarstíl og hefur fengið innblástur eftir innreið kreppunnar hér á landi.

Listamaðurinn Guðmundur Atlason málar verk í anda popplistarinnar og sækir innblástur í íslenskt þjóðlíf, kreppuna og búsáhaldabyltinguna. Guðmundur hóf að mála fyrir fimmtán árum í kjölfar veðmáls þar sem hann vildi sýna og sanna fyrir vini sínum að hann gæti málað í sama stíl og meistari Erró. Hann málaði sex myndir og lagði svo pensilinn á hilluna þar til hann hóf að mála aftur nú í vor.

„Fyrir kreppu hafði ég rekið eigið fyrirtæki í byggingabransanum, en tveimur vikum eftir hrunið varð allt stopp og hefur ekki farið í gang aftur síðan. Ég var að íhuga að yfirgefa Ísland og fá vinnu erlendis og vildi fá meðmæli frá erlendum aðila. Ég hafði samband við mann í Bandaríkjunum, Edward Christians, forstjóra Saga Communication, til að fá meðmæli og sá hafði séð eitt verka minna á skrifstofunni í gamla daga. Hann spurði mig af hverju ég sneri mér ekki þess í stað að myndlistinni og eftir smá umhugsun ákvað ég að láta verða af því,“ útskýrir Guðmundur.

Málverkin eru akrýlverk og segir Guðmundur að sér finnist best að vinna með teiknimyndastílinn því á þann hátt geti hann sagt sögu með verkum sínum. Hann er þó ekki einn að vinna verkin því hann starfar með syni sínum, Atla, sem er í þjálfun hjá Guðmundi um þessar mundir.

Máverkin þykja mjög raunsæ og á einu verki þeirra feðga má sjá Gunnar Má Pétursson mótmæla á Austurvelli, en Gunnar Már er líklega þekktastur sem Helvítis Fokking Fokk-maðurinn. „Það tók okkur eina og hálfa viku að mála peysuna hans í smáatriðum og skiltið er einnig nákvæm eftirlíking af fyrirmyndinni,“ segir Guðmundur.

Sýning með verkum Guðmundar og Atla verður opnuð á föstudaginn í Kaffi París við Austurstræti 14.

sara@frettabladid.is