Manchester United búið að bjóða í Antonio Valencia

Dave Whelan stjórnarformaður enska úrvalsdeildarfélagsins Wigan staðfesti í samtali við Sky Sports fréttastofuna að Englandsmeistarar Manchester United væru búnir að leggja á borð kauptilboð í kantmanninn knáa Antonio Valencia.

„Forráðamenn United eru búnir að tala reglulega við okkur út af Antonio síðustu tvo til þrjá mánuði. Þeir hafa mikinn áhuga á honum og hafa reyndar þegar lagt fram kauptilboð í leikmanninn. Ég reikna með því að gengið verði að samningaborðinu á allra næstu dögum," segir Whelan.

Whelan viðurkennir þó að hann vilji helst halda hinum 23 ára gamla leikmanni frá Ekvador.

„Við viljum helst ekki selja hann og ef það væri möguleiki á að halda honum áfram þá gerum við það því hann er frábær leikmaður. Það verður hins vegar erfitt að sannfæra hann um að vera áfram ef að stórfélag eins og United kemur á eftir honum. Hann hefur mikinn metnað og vill spila spila í Meistaradeildinni," segir Whelan.

Kauptilboð United er talið vera í kringum 16 milljónir punda.