Stjörnurnar sáu Bræður Sigurjóns í New York

„Undirtektirnar voru sannast sagt ótrúlegar og í rauninni bjóst ég ekki við þeim svona sterkum,“ segir Sigurjón Sighvatsson, kvikmyndaframleiðandi. Forsýning var á kvikmynd hans, Brothers, á sunnudagskvöldið í SVA Theater í New York að viðstöddum aðalleikurum myndarinnar, þeim Natalie Portman og Tobey Maguire, og leikstjóranum Jim Sheridan. Fjöldi nafntogaðra gesta lagði leið sína í kvikmyndahúsið og nægir þar að nefna The Edge, gítarleikara U2, en sveitin á einmitt titilag myndarinnar. Þá var Ang Lee einnig meðal gesta sem og gamli Karate Kid-leikarinn, Ralph Macchio.

Sigurjón lýsir myndinni sem tilfinningalega sterkri. „Og allt sem gerist í henni kristallar það sem er að gerast í amerísku þjóðfélagi um þessar mundir,“ útskýrir hann en Brothers er endurgerð á danskri kvikmynd og segir frá örlögum tveggja bræðra og hvernig líf þeirra breytist þegar annar þeirra er heimtur úr helju frá stríðinu í Afganistan eftir að hafa verið talinn af. Hinn bróðirinn er þá orðinn ástfangin af mágkonu sinni og hefur gengið frænkum sínum í föðurstað.

Eins og Fréttablaðið greindi frá fyrir skemmstu tekur kvikmyndin virkan þátt í Óskarskapphlaupinu og verður 400 millljónum íslenskra króna varið í að kynna hana fyrir meðlimum Óskarsakademíunnar. Ef marka má fyrstu viðbrögð gagnrýnenda er ljóst að Sigurjón og félagar hafa ef til vill veðjað á réttan hest.

Screen Daily fer lofsamlegum orðum um myndina, telur hana eiga eftir að berjast um helstu verðlaunin. Leikstjórinn Sheridan fær sitt hrós en það eru leikararnir þrír, þau Portman, Jake Gyllenhaal og Maguire sem er hrósað hvað mest. „Þetta er besta frammistaðan hjá þeim öllum á þeirra ferli,“ skrifar gagnrýnandi Screen Daily, Mike Goodridge.

Sigurjón viðurkennir að á löngum ferli sínum sé þetta sennilega sú kvikmynd sem mest hefur verið lagt í á svokölluðum Hollywood-mælikvarða.

„En auðvitað er enn langur vegur framundan og það er ekkert öruggt í hendi.“

-freyrgigja@frettabladid.is