Suðurlandsskjálftinn: 733 milljónir í styrki

Íslenska ríkið mun greiða út 733 milljónir króna í styrki vegna jarðskjálftans á Suðurlandi þann 29. maí í fyrra. Stærsti hluti þess, eða 402 milljónir, fara til einstaklinga sem urðu fyrir tjóni en tryggingar ná ekki til. Þá fara 200 milljónir króna til sveitarfélaga á svæðinu vegna fyrstu viðbragða við skjálftanum.

Í tilkynningu frá forsætisráðuneytinu kemur fram að forsætis- og fjármálaráðuneytið hefjist brátt handa við að greiða út styrki vegna niðurrifs, endurmats á brunabótamati, tjóns á innbúum og fleira, en samkvæmt viðgerðarreikningum þegar um er að ræða stéttar, palla, veggi, hleðslur, frárennsli, vatnsveitur, borholur o.þ.h. Þær viðgerðir hefjast væntanlega flestar næsta vor.

Í tilkynningunni segir að skjálftinn hafi ollið gríðarlegu tjóni sem metið er á milljarða króna „enda voru þetta mestu hamfarir sem gengið hafa yfir jafn fjölmenna og þéttbýla byggð hér á landi. Jarðskjálftinn reyndi þess vegna mikið á alla þætti samfélagsins, þ.á.m. styrk mannvirkja, stjórnsýslu sveitarfélaga og ríkisins, fjarskiptakerfi, rekstur fyrirtækja og viðbragðsgetu Almannavarna, löggæslu og slökkviliðs. Sjálfboðaliðar svo sem björgunarsveitir, Rauði krossinn og fleiri samtök lögðu fram gífurlega mikla vinnu og er þeim þakkað sérstaklega."

Þá segir einnig að samdóma álit sé að mjög vel hafi tekist til um viðbrögð við skjálftanum. „Stöðugt bætist við þá reynslu okkar, sem því miður er dýru verði keypt, hvernig best sé að bregðast við náttúruhamförum í landi okkar. Eitt af því sem við höfum lært af biturri fyrri reynslu er að ekki duga fyrstu viðbrögðin ein, heldur þarf þess í stað að setja á fót langtíma stuðning á hamfarasvæðinu. Af þessum sökum voru sett ný lög sem tóku á þessu og sett var upp þjónustumiðstöð í Tryggvaskála sem hefur starfað allt frá skjálftadegi. Almannavarnadeild og embætti ríkislögreglustjóra önnuðust rekstur þjónustumiðstöðvarinnar frá upphafi. Síðustu mánuði hefur þjónustumiðstöðin tekið við erindum vegna tjóna og ráðuneyti í góðri samvinnu við bæjarstjóra samþykkt tillögur um styrki."

Nánar má fræðast um málið á heimasíðu forsætisráðuneytisins.