Þórunn skoraði í öðrum leiknum í röð

Þórunn Helga Jónsdóttir skoraði eitt marka brasilíska liðsins Santos í 6-0 sigri á Vera Cruz um helgina en leikið var á heimavelli Vera Cruz. Þórunn Helga skoraði þarna í sínum öðrum leik í röð en hún skoraði sitt fyrsta mark fyrir Santos í 11-0 sigri á Brasileirinho helgina áður. Þórunn Helga sagði í viðtali við Vísi.is að hlutverk hennar væri ekki að skora mörk en eftir að hafa skorað í tveimur leikjum í röð gæti það nú breyst. Þórunn Helga skoraði annað mark Santos í leiknum en leikurinn var í 2. umferð í Campeonato Paulista sem er keppni félaga í Sao Paulo héraðinu. Næsti leikur liðsins verður á móti Itariri á næsta laugardag.