Wilshere með tvennu þegar Arsenal vann Emirates-bikarinn

Skoska félagið Rangers var engin fyrirstaða fyrir Arsenal í úrslitaleik Emirates-bikarsins í dag en Lundúnafélagið vann öruggan 3-0 sigur.

Unglingurinn Jack Wilshere stal senunni og skoraði tvö marka Arsenal og Eduardo Da Silva eitt.

Wilshere kom Arsenal yfir eftir 90 sekúndur og Eduardo bætti öðru marki við á 10. mínútu og Arsenal yfirspilaði Rangers í fyrri hálfleiknum.

Wilshere fullkomnaði svo tvennu sína og innsiglaði sigur Arsenal með marki á 72. mínútu og þar við sat.

Þá skildu Atletico Madrid og Paris St. Germain jöfn 1-1. Sergio Aguero kom Atletico yfir með marki úr vítaspyrnu í lok fyrri háflleiks en Ludovic Guily jafnaði metin á 71. mínútu.