Fréttahaukur snýr sér að trommuleik

Fréttamaðurinn Haukur Holm fetar í fótspor sona sinna og þreifar sig áfram í tónlistinni. Hann segist vera vita laglaus en spilar þrátt fyrir það á gítar og er að leita sér að rafmagnstrommusetti.

„Ég hefði auðvitað helst viljað alvöru trommusett en þá hefði ég þurft að einangra allan bílskúrinn,“ segir sjónvarpsfréttamaðurinn skeleggi Haukur Holm, sem leitar nú logandi ljósi að rafmagnstrommusetti. Hann hyggst þó ekki sækja um stöðu trommuleikara í hljómsveitum sona sinna en telur sig hafa sitthvað fram að færa þegar kemur að því að berja húðirnar. Haukur segist líka vera að spá í þennan grip fyrir yngsta son sinn, sem hafi sýnt góða takta á trommur þótt hann læri nú á rafmagnsgítar hjá Gítarskóla Íslands.

Haukur upplýsir að það sé gamall draumur hjá honum að eignast trommusett. Sjónvarpsfréttamaðurinn segir að hann hafi einu sinni talað mjög mikið um þrá sína eftir trommusetti við eiginkonu sína og að ein jólin hafi hún látið undan og gefið honum gítar. „Ég veit reyndar ekkert hvaðan þessi gítar kom. En ég fór auðvitað að æfa mig og taldi mig vera orðinn þokkalegan gítarleikara nema að það vildi enginn hlusta á mig,“ segir Haukur og rifjar upp skondna sögu þegar hann sat eitt sinn og spilaði og sonur hans heyrðist segja við móður sína: „Ég veit að pabba dreymir um að verða gítarleikari, en það geta bara ekki allir draumar ræst.“

En þrátt fyrir allt hefur tónlistin tekið öll völd hjá sonum Hauks. Georg er auðvitað bassaleikari í Sigur Rós, Kjartan gítarleikari í For a Minor Reflection og nú er sá yngsti, Starri, farinn að feta sig áfram á tónlistarveginum. Hann var til að mynda í námi hjá Ragnari Zolberg, aðalsprautunni í Sign, og þeir tveir hafa tekið upp tvö lög sem eru kirfilega varðveitt á geisladisk.

Haukur kveðst raunar ekki skilja hvaðan þessi tónlistargen komi því sjálfur sé hann gjörsamlega laglaus. „En ég hef alltaf hlustað mikið á tónlist, lesið mér til um hana og tel mig vera nokkuð vel að mér í rokkfræðunum,“ segir Haukur og jánkar því að strákarnir hans séu að uppfylla gamlan draum hans, um að standa á sviði fyrir framan áhorfendur og spila rokk. „Það var annaðhvort það eða að verða góður í íþróttum. Annars held ég að strákarnir mínir séu búnir að fara með drauminn langt umfram það sem gamla manninn dreymdi alltaf um.“

freyrgigja@frettabladid.is