Íranar fagna boði um kjarnorkuviðræður

Yfirvöld í Íran taka vel í tilboð sex ríkja um að hefja viðræður um kjarnorkuáætlun landsins. Bandaríkin eru í hópi þeirra sem vilja ræða við Írana um málið og í yfirlýsingu frá stjórnvöldum sem lesin var upp í íranska ríkisútvarpinu í dag var greint frá því að þar á bæ fagni menn uppbyggilegum viðræðum um málið.

Viðræðurnar muni hins vegar engin áhrif hafa á kjarnorkuáætlun Írans sem fram verði haldið í samvinnu við Alþjóðakjarnorkustofnunina. Bandaríkjamenn og vestrænir bandamenn þeirra gruna Írana um að vera að vinna að smíði kjarnorkuvopna en þeir staðhæfa að aðeins sé um friðsamlegar áætlanir að ræða.