Bellamy: Þúsaldarvöllurinn er alltof stór fyrir Wales

Craig Bellamy, fyrirliði velska landsliðsins, er á því að landsliðið eigi líka að spila á öðrum og minni völlum en Þúsaldarvellinum í Cardiff. Þúsaldarvöllurinn tekur 74 þúsund manns en velska landsliðið er langt frá því að fylla völlinn á sínum landsleikjum.

„Þegar þú ert að fá 18 þúsund manns á leik á svona stórum velli þá er svo mikið um auð sæti í stúkunni. Það er erfitt að ná upp alvöru stemmningu við slíkar aðstæður," sagði Bellamy en velska knattspyrnusambandið er sem dæmi aðeins búið að selja tíu þúsund miða á leikinn við Rússa í kvöld.

Norður-Írar segja að sinn litli Windsor-völlur eigi mikið í frábærum árangri þeirra. „Við erum að fá 13.500 manns á völlinn en það er eins og það séu 80 þúsund séu á staðnum," sagði Nigel Worthington, þjálfari norður-írska landsliðsins. „Okkar stuðningsmenn eru okkar tólfti maður og við spilum alltaf vel á Windsor Park," sagði Worthington.

Norður-Írar eru í hörkukeppni við Slóvaka um sigurinn í 3. riðli en Wales á aðeins stærðfræðilega möguleika á að komast áfram á HM upp úr 4. riðli. Wales er með 9 stig úr 7 leikjum, tíu stigum minna en topplið Þjóðverja og níu stigum minna en Rússar sem eru í öðru sætinu.

Heimaleikir Wales í undankeppni HM 2010 og aðsókn á þá:

Wales 1-0 Aserbaídsjan (17.106, 23%)

Wales 2-0 Liechtenstein (13.356, 18%)

Wales 0-2 Finnland (22.604, 31%)

Wales 0-2 Þýskaland (26.064, 35%)